“Jemi prekur të gjithë”, Kuvendi mban një minutë heshtje për tragjedinë e Durrësit

Seanca plenare e kësaj të hëne në Kuvendin e Shqipërisë është hapur me një minutë heshtje në nderim të dy fëmijëve që humbën jetën në aksidentin tragjik

Seanca plenare e kësaj të hëne në Kuvendin e Shqipërisë është hapur me një minutë heshtje në nderim të dy fëmijëve që humbën jetën në aksidentin tragjik të regjistruar një ditë më parë në zonën e Spitallës, në Durrës.

Nënkryetarja e Kuvendit, Klodiana Spahiu, gjatë fjalës së saj në hapje e cilësoi ngjarjen si thellësisht tronditëse, duke theksuar se humbja e jetëve në një moshë kaq të vogël përbën një dhimbje të rëndë njerëzore dhe shoqërore.

“Ngjarja në Durrës, ku humbën jetën dy fëmijë, na ka prekur të gjithëve. Është një dhimbje e madhe për familjet, por edhe për shoqërinë në tërësi. Nuk ka fjalë për të përshkruar dhimbjen e prindërve që humbën fëmijët e tyre. U prehshin në paqe”, deklaroi Spahiu.

Aksidenti ndodhi dje, kur një automjet tip “Benz ML”, i drejtuar nga 57-vjeçari Nikoll Radaçi, përplasi tre të mitur. Dy prej tyre humbën jetën në vendngjarje, ndërsa fëmija i tretë ndodhet në kujdesin e mjekëve në Spitalin e Traumës dhe raportohet jashtë rrezikut për jetën.

Sipas hetimeve paraprake, dyshohet se drejtuesi i mjetit ka qenë në gjendje të dehur në momentin e aksidentit.

Për ngjarjen kanë reaguar Presidenti Bajram Begaj, Kryeministri Edi Rama dhe përfaqësues të politikës nga të dyja kampet, të cilët kanë shprehur ngushëllime për familjet dhe kanë kërkuar zbardhjen e plotë të rrethanave të tragjedisë.