“Kam kaluar shumë”/ Nga deklarata e yllit të Kombëtares që mbetet jashtë te Maran: Muçi? Asnjë shqetësim, mundësia për të tjerë

Nga Emanuel Loci, Panorama Sport. Ernest Muçi ka përfunduar në tribunë për ndeshjen Bjellorusi-Shqipëri. Ylli i Kombëtares nuk do të jetë i gatshëm për finalen ku mjafton edhe barazimi te kuqezinjtë. Sfida sot në Hungari nis prej orës 18:00.

Muçi qëndroi për 82 minuta në fushë ndaj Finlandës. Më pas erdhi zëvendësimi, ndërsa FSHF ka raportuar dje se për shkak të një goditje gjatë sfidës nuk është stërvitur për të shmangur dëmtimin.

Vetë Muçi tregonte për sakrificat te Kombëtarja pas fitores në “Air Albania”. ”Ky është momenti që ndiej besim nga shokët e ekipit, nga trajneri dhe tifozët. Kam kaluar shumë gjëra për të ardhur në këtë ditë. Jam shumë i lumtur që jemi në këtë pozicion”, shpreh Muçi.

Në anën tjetër, Rolando Maran ishte i qetë dje në konferencë për shtyp. “Ramadani dhe Muçi? I shqetësuar jo, se kam në dispozicion disa lojtarë, dhe jemi kombëtare ku djemtë që janë, janë në lartësinë e duhur për të bërë mirë.

Asnjë shqetësim, do të jetë mundësia që lojtarë të tjerë të jenë të vlefshëm, të gjithë duan të japin diçka për këtë fanellë dhe do jetë një mundësi për ta. Muçi nuk u stërvit sot, do e vlerësojmë nesër dhe të shohim pak si do jetë nesër”.