Kanadaja nga viti 2027-të do të marrë pjesë në Eurovision

Kanadaja do t’i bashkohet konkursit të këngës në Eurovision vitin e ardhshëm, duke u bërë pjesëmarrësja e parë e re që nga Australia në vitin 2015.

Pjesëmarrja nuk kufizohet vetëm në vendet në Evropën gjeografike dhe përkundrazi është e hapur për të gjithë anëtarët e Unionit Evropian të Transmetimeve (EBU), të cilit Kanadaja iu bashkua javën e kaluar. Australia është një anëtare e asociuar.

EBU dhe transmetuesi publik kanadez CBC njoftuan të mërkurën se Kanadaja do të dërgonte një artist në konkursin e vitit 2027, që do të mbahet në Bullgari në maj. Njoftimi u bë në Ditën e Kanadasë, një festë kombëtare.

Presidentja e CBC-së, Marie-Philippe Bouchard tha se pjesëmarrja do t’i lejojë talentit kanadez të shfaqet në një nga skenat muzikore më të famshme në botë.

CBC tha se do të njoftojë detajet se si do të zgjidhet pjesëmarrësi i Kanadasë më vonë këtë vit. Disa vende të Eurovisionit i zgjedhin konkurrentët e tyre përmes përzgjedhjeve kombëtare të transmetuara në televizion. Në vende të tjera, konkurrentët zgjidhen nga transmetuesi kombëtar.

Drejtori i Eurovisionit, Martin Green, tha se pranimi i Kanadasë ishte një shenjë e mëtejshme se, ndonëse i lindur në Evropë, konkursi vazhdon të mirëpresë botën.

Kanadezët kanë marrë pjesë në Eurovision më parë nën flamuj të ndryshëm, më i famshmi i të cilit është Celine Dion, e cila fitoi konkursin e vitit 1988 duke garuar për Zvicrën.

Konkursi i 70-të i Eurovisionit, i mbajtur në maj, paraqiti 35 vende dhe u fitua nga këngëtarja bullgare Dara, kështu që konkursi i vitit të ardhshëm do të zhvillohet në vendin e saj.

Eurovision është përballur me protesta vitet e fundit për shkak të pjesëmarrjes së Izraelit, një konkurrent që nga viti 1973. Pesë pjesëmarrës të hershëm: Spanja, Holanda, Irlanda, Islanda dhe Sllovenia bojkotuan këtë vit pasi organizatorët refuzuan të përjashtonin Izraelin për shkak të luftës së tij kundër Hamasit në Gaza dhe dhunës kundër palestinezëve në Bregun Perëndimor.