Kërcënoi me thikë policin tek Casa Italia/ Tiranë, arrestohet 38-vjeçari Dorian Kasa

Një punonjës policie është kërcënuar me thikë në afërsi të një qendre tregtare (casa Italia) mëngjesin e sotëm. Dorian Kasa tashmë i arrestuar i ka vendosur thikën në qafë policit por ky i fundit ka reaguar dhe e ka neutralizuar.

Specialistët për Hetimin e Krimeve të Rënda ndaj Personit arrestuan në flagrancë, për veprat penale “Vrasja e punonjësve të Policisë së Shtetit”, mbetur në tentativë, dhe “Prodhimi, mbajtja, blerja apo shitja pa leje e armëve të ftohta”, shtetasin D. K., 38 vjeç.

Më datë 05.06.2026, rreth orës 08:20, në afërsi të kthesës së Kamzës, 38-vjeçari në mënyrë të menjëhershme i ka vënë në fyt, mjetin prerës (thikë) që kishte me vete, një punonjësi të Policisë që ishte në krye të detyrës, duke menaxhuar trafikun rrugor.

Gjithashtu, 38-vjeçari ka tentuar t’i marrë efektivit, armën e shërbimit, por është neutralizuar dhe vënë menjëherë në pranga nga shërbimet e Policisë.