Komisioneri Antonijeviç: Po vijnë ankesat për fushatën zgjedhore — gjuhë urrejtjeje dhe diskriminim

Komisioneri për Mbrojtjen e Barazisë në Serbi, Milan Antonijević, deklaroi sot se në institucionin që ai drejton tashmë kanë nisur të mbërrijnë ankesat për materialet e fushatës zgjedhore, për të cilat dyshohet se përmbajnë gjuhë urrejtjeje ose forma të tjera diskriminimi — kjo në prag të zgjedhjeve të parakohshme parlamentare të 25 tetorit.

Ankesat e para, sipas tij, shtrihen “nga mesazhet haptazi mizogjine dhe paralajmërimet për hakmarrje pas zgjedhjeve, te mesazhet në të cilat kandidatët nënçmohen për shkak të kombësisë së tyre reale apo të perceptuar”. Çdo ankesë, theksoi Antonijević, do të shqyrtohet me kujdes dhe do të veprohet aty ku ligji e lejon.

Komisioneri tha se me shqetësim po i ndjek edhe incidentet e regjistruara në pikat e fushatës dhe përreth tyre. Kundërshtarët politikë, theksoi ai, duhet të kenë të drejtë të barabartë për të bërë fushatë, për të folur me qytetarët dhe për të qenë të pranishëm në hapësirën publike — pa frikësim, ofendime apo përplasje fizike.

Gjatë ditës së sotme Antonijević u bëri thirrje qytetarëve, partive dhe pjesëmarrësve të tjerë në zgjedhje që t’i dërgojnë materialet e fushatës që ata i konsiderojnë si përmbajtje me gjuhë urrejtjeje apo diskriminim, si dhe kërcënimet apo mesazhet me elementë penal t’i raportojnë menjëherë në prokurori apo në polici.

Fushata zgjedhore, theksoi ai, është hapësirë për debat të ashpër politik, por gjinia, kombësia dhe tiparet e tjera personale nuk guxojnë të shfrytëzohen si mjete për të diskredituar kundërshtarin politik: “Kërcënimet dhe dhuna nuk janë debat politik — për to duhet të merren organet kompetente.”

Burimi: Danas