Korça mbush sheshet e rrugët kundër qeverisë, thirrje për largimin e Ramës

KORÇË – Pedonalja e Korçës u mbush pasditen e së premtes me qytetarë, të rinj, aktivistë dhe përfaqësues të shoqërisë civile, të cilët iu bashkuan valës së protestave që kanë përfshirë vendin kundër projektit të planifikuar në Zvërnec dhe politikave të qeverisë.

Me pankarta në duar dhe thirrje kundër kryeministrit Edi Rama, protestuesit kërkuan anulimin e projektit në Zvërnec, shfuqizimin e Paketës së Maleve dhe më shumë transparencë në vendimmarrjet që lidhen me pasuritë publike dhe mjedisin.

Atmosfera në qendër të qytetit ishte e ngarkuar me emocione dhe revoltë qytetare. Qindra protestues mbushën pedonalen duke brohoritur kundër qeverisë dhe duke bërë thirrje për zgjerimin e protestave në ditët në vijim.

“Qoftë e bekuar pika që mbush gotën” dhe “Ti dogje rininë, sot të djeg rinia ty!” ishin ndër pankartat më të spikatura që tërhoqën vëmendjen gjatë tubimit. Në mes të turmës dëgjoheshin thirrje për largimin e kryeministrit dhe për ndryshim politik, ndërsa organizatorët u bënë apel qytetarëve që protestat të vijojnë në mënyrë paqësore dhe masive.

Një moment prekës i protestës ishte mbajtja e një minute heshtje në nderim të efektivit të Policisë së Shtetit, Enea Mekolli, i vrarë pak ditë më parë. Protestuesit ngritën gjithashtu pankarta dhe mesazhe që lidhen me ngjarjen tragjike, duke shprehur solidaritet me familjen e tij.

Folësit që morën fjalën gjatë tubimit theksuan se kundërshtimi i tyre nuk lidhet vetëm me projektin në Zvërnec, por me mënyrën se si, sipas tyre, po administrohen pasuritë publike dhe po merren vendime me ndikim afatgjatë për vendin pa konsultim të mjaftueshëm me qytetarët.

Në përfundim të protestës, organizatorët njoftuan se mobilizimi do të vazhdojë edhe në ditët e ardhshme, duke bërë thirrje për pjesëmarrje më të gjerë qytetare në protestat e radhës.

Korça iu bashkua kështu qyteteve të tjera të vendit që gjatë ditëve të fundit kanë parë pjesëmarrje të lartë në protestat kundër qeverisë, duke e kthyer debatin mbi Zvërnecin dhe politikat e qeverisë në një nga çështjet më të diskutuara të momentit.