Kordiq nga Baku: Mali i Zi u ofron investitorëve stabilitet, parashikueshmëri dhe transparencë

Ministrja e Turizmit të Malit të Zi, Simonida Kordiq, mori pjesë në Forumin e dytë Ndërkombëtar të Investimeve në Azerbajxhan, në Baku, ku janë mbledhur rreth 3.000 pjesëmarrës nga 40 vende — përfaqësues qeverish dhe institucionesh ndërkombëtare, investitorë globalë, institucione financiare dhe liderë biznesi, sipas shkrimit të Mediabiro-së, cituar nga Vijesti.

Kordiq vlerësoi se Mali i Zi shënon rritje të fortë turistike dhe investimesh. Ajo tha se Mali i Zi u ofron investitorëve ndërkombëtarë stabilitet, parashikueshmëri dhe transparencë, me orientim të qartë shtetëror drejt investimeve cilësore dhe afatgjatë të qëndrueshme. “Rezultatet janë tashmë të dukshme. Mali i Zi është sot shtëpia e brandeve kryesore ndërkombëtare hoteliere, mes të cilëve One&Only, Aman, Regent, Hilton, Hyatt, The Chedi, Swissôtel, Mövenpick… Prania e tyre për ne nuk është e rëndësishme vetëm për kapacitetet shtesë akomoduese. Këto brande sjellin standarde ndërkombëtare të menaxhimit, ekspertizë, akses në tregjet globale dhe, çka është veçanërisht e rëndësishme, besim shtesë në Malin e Zi si destinacion i sigurt dhe premtues investimesh”, tha Kordiq.

Ajo vuri në dukje edhe rolin gjithnjë më të rëndësishëm të Malit të Zi në planin multilateral: vendi kryeson Komisionin për Evropën pranë Organizatës Botërore të Turizmit. Turizmi, si dega më e madhe ekonomike në Mal të Zi, shënon rritje të fortë, ndërsa potenciali investues i vendit zgjerohet gjithnjë e më shumë përtej zonave tradicionalisht më atraktive bregdetare. Kordiq veçoi veriun e Malit të Zi, i cili sivjet shënoi rezultate rekord turistike dhe paraqet hapësirë me potencial të konsiderueshëm për investime të reja, cilësore dhe të qëndrueshme.

Në kuadër të vizitës në Baku, Kordiq u takua me Mir Jamal Pashayevin, nënkryetar i Bordit Drejtues të Pasha Holding, si dhe me Emin Agalarovin, themeluesin dhe pronarin e Sea Breeze Resort; u bisedua për projektet aktuale dhe të ardhshme investuese, ndërsa bashkëbiseduesit theksuan perceptimin e Malit të Zi mes qytetarëve të Azerbajxhanit si destinacion i sigurt turistik, sipas Vijesti.