Kričak merret në pyetje për torturën në garazhin e Qeverisë së Serbisë, prokuroria kërkon paraburgim edhe në këtë çështje
Prokuroria Themelore e Parë në Beograd i propozoi gjykatës paraburgim për Marko Kričakun, pasi ai u mor në pyetje sot për keqtrajtimin dhe torturën e dhjetë personave në garazhin e Qeverisë së Serbisë në gusht 2025.
Marko Kričak, ish-shef i Njësisë për Mbrojtjen e Personave dhe Objekteve të Caktuara (JZO) dhe shef i pezulluar i Drejtorisë së Policisë Kriminale (UKP), u mor në pyetje sot nga Prokuroria Themelore e Parë në Beograd për veprën penale “keqtrajtim dhe torturë”, sipas komunikatës së Prokurorisë Themelore të Parë në Beograd, raporton Izlaz. Prokuroria i propozoi Gjykatës Themelore të Parë caktimin e paraburgimit për Kričakun, të lindur më 1983.
Sipas prokurorisë, Kričak dyshohet se veprën e ka kryer si bashkëkryerës me nëntë të dyshuar të tjerë, pjesëtarë të Ministrisë së Punëve të Brendshme. Të dyshuarit, natën mes 14 dhe 15 gushtit 2025, nga ora 22:30 deri në 01:00, në garazhin e Qeverisë së Serbisë në rrugën Nemanjina në Beograd, duke përdorur forcë dhe kërcënime u shkaktuan dhimbje të mëdha dhe vuajtje të rënda dhjetë personave të dëmtuar, me qëllim që të merrnin informacione prej tyre, t’i frikësonin dhe t’i ndëshkonin në mënyrë të paligjshme.
Propozimi i paraburgimit u bë për rrezikun se në liri Kričak mund të ndikojë te të dëmtuarit, dëshmitarët e tjerë ose ndihmësit e mundshëm, si dhe të shkatërrojë, fshehë, ndryshojë ose falsifikojë provat dhe gjurmët e veprës. Prokuroria e propozoi paraburgimin edhe për shkak të shqetësimit të publikut që kanë shkaktuar mënyra e kryerjes së veprës dhe pasojat e saj.
Në vazhdim të hetimit do të merren në pyetje personat e dëmtuar, njoftoi prokuroria. Kričak ndodhet tashmë në paraburgim në një çështje tjetër, atë të njohur si “Senjak”, ku u arrestua më 1 nëntor.


Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.