Kryebashkiaku i Lezhës: Koçeku u fut në listën e PS pa asnjë kontribut politik të mëparshëm, duhet të dorëzojë mandat

Kryetari i Bashkisë së Lezhës, Pjerin Ndreu ka dalë në reagim së fundmi përmes një postimi në “Facebook” lidhur me vendimin e deputetes Marjana Koçekut për t’u larguar nga grupi i Partisë Socialiste.

Sipas tij, heqja dorë nga mandati i marrë nga mijëra socialistë shkodranë do të ishte një akt që do ta fisnikëronte Koçekun duke e cilësuar si mike të tij. Ai theksoi se kjo nuk është dramë për PS-në, por është shkelje besimi.

“Malësorët, e as neomalësorët, nuk kanë shitur e as blerë kurrë atë që u është dhënë me mirëbesim dhe respekt.

Kushdo, në kushte e rrethana të tjera, mund të ndryshojë mendim apo ide, mund të mos e gjejë më veten ose të mos përputhet me një forcë politike. Kjo është krejt normale.

Por nderi i caktimit në krye të listës politike të qarkut më të madh në veri, pa asnjë kontribut politik të mëparshëm, moralisht nuk duhet të keqpërdoret.

Heqja dorë nga mandati i marrë në sajë të votës së mijëra socialistëve shkodranë do të ishte një akt që do ta fisnikëronte miken time, Marjana Koçeku.

Kjo nuk është dramë për PS-në, por është shkelje besimi, për sa kohë që keqpërdoret mandati i dhënë politikisht nga PS.

Përtej ekzaltimeve të disave që besojnë se u shemb bota, duhet të mbizotërojë morali i malësorit, aty ku ha bukë, nuk përmbys kupën”, shkruan Pjerin Ndreu.