Kryeministri hungarez Péter Magyar uron Kurtin për mandatin e ri: Hungaria e përkushtuar për sigurinë e Kosovës dhe integrimin evropian

Kryeministri i Hungarisë, Péter Magyar, ka uruar kryeministrin e Kosovës, Albin Kurti, për mandatin e ri qeverisës, duke i dërguar letër urimi nëpërmjet ambasadorit hungarez në Kosovë, László István Dux, siç njofton fiks.al.

“Dua t’ju shpreh urimet më të sinqerta për zgjedhjen tuaj Kryeministër i Republikës së Kosovës. Ne njohim rolin kyç të Kosovës në stabilitetin e rajonit të Ballkanit Perëndimor”, shkroi Magyar në letër, duke shtuar se një Ballkan Perëndimor prosperues ka rëndësi jetike për Hungarinë dhe mbarë kontinentin evropian.

Kryeministri hungarez rikonfirmoi përkushtimin e Hungarisë për sigurinë e Republikës së Kosovës dhe shprehu mbështetjen për integrimin e saj evropian: “Hungaria mbetet e përkushtuar për të kontribuar për sigurinë e Kosovës nëpërmjet pjesëmarrjes në misionin e KFOR-it dhe për të mbështetur vendin tuaj në rrugën evropiane”.

Sipas njoftimit të zyrës për informim të Kryeministrit, të cilin e citoi realiteti.net, Kurti shprehu mirënjohje për angazhimin e Hungarisë në Kosovë, duke theksuar rolin e saj në proceset integruese si dhe në ruajtjen e paqes dhe sigurisë rajonale përmes kontributit me trupa në kuadër të KFOR-it. Në takim u diskutua edhe për zgjerimin e bashkëpunimit ekonomik e tregtar, si dhe për rritjen e numrit të bursave të programit hungarez Stipendium Hungaricum për studentët nga Kosova në 75 në vit.