Kryeministri Li Keqiang sqaron kreun e FMN-së për zhvlerësimin e monedhës

Kryeministri i Kinës Li Keqiang e ka siguruar presidenten e FMN-së Christine Lagarde, se Pekini “nuk ka për qëllim të rrisë eksportet, përmes zhvlerësimit të monedhës dhe as të ndërmarrë një luftë tregtare”. Këtë deklaratë kreu i qeverisë kineze e bëri në një bisedë telefonike me shefen e FMN-së Lagarde. Ai shtoi se ekonomia kineze ka arritur një rritje ekonomike me shpejtësi të mesme dhe të lartë në 6.9% vitin e kaluar, me nivel të mjaftueshëm punësimi dhe një rritje më të shpejtë të të ardhurave dhe depozitave për banorë se sa ajo ekonomike.

Nga ana e saj Lagarde shprehu besimin se qeveria kineze do të jetë e aftë të ruajë një rritje të qëndrueshme të ekonomisë. Ajo theksoi se FMN-ja dëshiron të forcojë më tej komunikimin dhe bashkëpunimin me Kinën, për mbarëvajtjen e reformave dhe rritjen e besimit në treg.