Kurti: U bë mirë që u konstituua Kuvendi, tani duhet të formohet Qeveria

Kryeministri në detyrë i Kosovës, Albin Kurti, ka shprehur kënaqësinë e tij pas përfundimit të seancës konstituive të Kuvendit të Kosovës.

Kurti e ka cilësuar konstituimin e Kuvendit si një arritje, ndërsa ka thënë se Lëvizja Vetëvendosje është e gatshme ta votojë kandidaten e PDK-së, Vlora Çitakun, për postin e nënkryetares, në momentin që kjo parti propozon sërish kandidaturën.

“U bë mirë që u konstituua Kuvendi. Nënkryetari i dytë i Kuvendit të Republikës së Kosovës i takon Partisë Demokratike të Kosovës. Në çdo moment që janë të gatshëm ta propozojnë zonjën Vlora Çitaku, ne menjëherë do ta votojmë”, tha Kurti.

Ai uroi deputetët për përmbylljen e procesit të konstituimit dhe theksoi se tani procesi institucional duhet të vazhdojë me formimin e Qeverisë.

Kurti krahasoi kohën e nevojshme për konstituimin e Kuvendit me legjislaturën paraprake, duke thënë se kësaj here procesi përfundoi brenda rreth tre muajsh nga zgjedhjet.

“Përafërsisht tre muaj pas zgjedhjeve të parakohshme të 14 shkurtit u konstituua Kuvendi i Republikës për legjislaturën e tetë, ndërkaq ju e dini që në vitin e kaluar janë dashur tetë muaj nga zgjedhjet që të konstituohet Kuvendi. Nga tetë muaj tash e kishim tre muaj. Natyrisht do të ishte më mirë që të bëhej edhe më herët, por urime të gjithëve, se megjithatë është një arritje, e cila tash duhet të vazhdojë me formim të Qeverisë”, u shpreh Kurti.

Ai përsëriti se LVV-ja është e gatshme të votojë Çitakun për nënkryetare, duke theksuar se posti i takon PDK-së. /Telegrafi/