Kuvendi çel Sesionin III të Legjislaturës XI, Peleshi: Anëtarësimi në BE, prioriteti numër një

Kuvendi i Shqipërisë ka çelur sot punimet e Sesionit III të Legjislaturës XI, duke rikthyer aktivitetin parlamentar pas periudhës së pushimeve.

Në seancën e parë plenare të sesionit të ri, fjalën e hapjes e mbajti Kryetari i Kuvendit, Niko Peleshi, i cili theksoi përgjegjësinë e Parlamentit për të vijuar punën në funksion të qytetarëve dhe interesit të vendit.

Peleshi e cilësoi anëtarësimin e Shqipërisë në Bashkimin Europian si prioritetin numër një të Kuvendit, duke nënvizuar se vendi e ka bërë zgjedhjen e tij europiane dhe tashmë duhet të vijojë punën për përmbushjen e objektivit.

“Shqipëria e ka zgjedhur Europën, tani duhet të bëjmë punën që na çon atje”, u shpreh Peleshi.

Kryetari i Kuvendit vuri theksin edhe te nevoja për një Parlament më aktiv, më të hapur ndaj qytetarëve dhe me më shumë llogaridhënie e përgjegjësi.

“Ky sesion duhet të jetë një tjetër hap përpara në forcimin e rolit të Kuvendit, në cilësinë e ligjbërjes dhe në përmbushjen e përgjegjësive tona ndaj qytetarëve”, deklaroi ai.

Peleshi u ndal gjithashtu te rëndësia e dialogut parlamentar, bashkëpunimit institucional dhe respektimit të rolit të institucioneve, duke theksuar se qytetarët presin punë konkrete dhe rezultate nga përfaqësuesit e tyre.

Sesioni i ri parlamentar nis me një axhendë të ngjeshur, ndërsa Kuvendi pritet të vijojë shqyrtimin e nismave ligjore, reformave dhe çështjeve me rëndësi për vendin.

Në përfundim të fjalës së tij, Peleshi theksoi se puna e Parlamentit duhet të vlerësohet përmes rezultateve konkrete në shërbim të qytetarëve dhe Shqipërisë.