Kuvendi i Shqipërisë rinis punimet, zbardhet rendi i ditës për seancën plenare të 8 shtatorit

Kuvendi i Shqipërisë do të rinisë punimet parlamentare ditën e martë, më 8 shtator 2026, në orën 17:00, duke shënuar kështu çeljen e sesionit të ri zyrtar. Vendimi është marrë përmes Urdhrit nr. 51, të nënshkruar nga Kryetari i Kuvendit, Niko Peleshi, në mbështetje të nenit 74, pika 1 të Kushtetutës dhe rregullores parlamentare.

Në urdhrin e zyrtarizuar nga kreu i parlamentit përcaktohet se “rendi i ditës i seancës plenare është si më poshtë: Hapja e punimeve të sesionit të III të Legjislaturës së XI të Kuvendit të Shqipërisë, miratimi i procesverbaleve të seancave plenare të datës 27.7.2026 dhe njoftime”.

Gjithashtu, në dokument bëhet me dije se “ngarkohen shërbimet e Kuvendit për publikimin e rendit të ditës të seancës plenare, njoftimin e anëtarëve të Kuvendit me anë të mjeteve të komunikimit elektronik, si dhe përgatitjen e dokumentacionit parlamentar që do të shqyrtohet”.

Procedurat e transmetimit të punimeve do të vijojnë sipas standardeve të mëparshme, ku sinjali do të merret nga RTSH-ja dhe seanca do të transmetohet drejtpërdrejt në kanalin RTSH Kuvend si dhe në faqen zyrtare në Facebook të Kuvendit të Shqipërisë.