Lamallari publikon pamjet nga Komisariati nr. 3: Dhuna ndaj institucioneve nuk ka vend në Shqipërinë europiane

Ministri i Brendshëm, Besfort Lamallari, ka publikuar pamje nga Komisariati nr. 3 në Tiranë, ku një ditë më parë disa protestues kanë thyer xhamat e godinës dhe kanë shkaktuar dëme materiale, ndërsa kërkonin lirimin e personave të ndaluar pas incidenteve të ndodhura gjatë protestës së 2 korrikut para Kuvendit.

Lamallari e cilësoi ngjarjen si pasojë të një cikli dhune të ushqyer, sipas tij, nga retorika e papërgjegjshme dhe nxitja e urrejtjes në hapësirën publike dhe në rrjetet sociale.

Ministri thekson se një dhunë dhe urrejtje e tillë nuk ka vend në një Shqipëri europiane.

“Një shembull konkret i ciklit të dhunës që nis me urrejtjen e nxitur nga një deklaratë e papërgjegjshme në mëngjes ‘për prova dhune dhe gjaku’, por që u ndryshua në drekë, iu hodh ‘benzinë’ pasdite nga moralistët, kritikët gjithollogë dhe delirantët revolucionarë si ushqim për rrjetin, përplot me profile të hapura rishtazi dhe të shumëfishuara nga zyra gjetkë, të ndihmuar nga algoritmi dhe të shoqëruar në fund me një pjatë të helmatisur simbolikash ataviste të një kulture që nuk ka vend në Shqipërinë europiane. Jemi më pranë se kurrë përmbushjes së aspiratës kombëtare ‘Shqipëria 2030’ dhe asgjë nuk na ndal”, shkruan Lamallari.

Protesta e 2 korrikut para Kuvendit u shoqërua me tensione dhe përplasje mes protestuesve dhe forcave të policisë, ndërsa disa persona u shoqëruan pas akteve të dhunës dhe dëmtimit të pronës publike.

Ata kanë dalë ditën e sotme para gjykatës ku pritet të njihen me masat e sigurisë.