Libani: 4.389 të vrarë nga sulmet izraelite që nga 2 marsi, thotë Ministria e Shëndetësisë

Ministria e Shëndetësisë e Libanit njoftoi të hënën se 4.389 njerëz janë vrarë nga sulmet izraelite që nga 2 marsi, kur luftimet në frontin libanez rifilluan në kuadër të luftës rajonale, siç njofton Al Jazeera.

Sipas të dhënave të ministrisë, në të njëjtën periudhë janë plagosur 12.424 njerëz. Bilanci i përgjithshëm i sulmeve izraelite në Liban që nga 8 tetori 2023 arrin kështu në 8.956 të vrarë dhe 30.660 të plagosur, bëri të ditur ministria në Bejrut.

Fronti libanez mbetet një nga vatrat aktive të konfliktit më të gjerë që nisi me luftën SHBA–Iran në shkurt: Izraeli ka vazhduar sulmet ajrore dhe me artileri në jug të vendit, ndërsa tensionet përgjatë kufirit janë shoqëruar edhe me incidente vdekjeprurëse jashtë zonave të luftimeve direkte.

Shifrat e përditësuara publikohen në një kohë kur përpjekjet diplomatike për uljen e tensioneve në rajon nuk kanë dhënë ende rezultat, dhe kur organizatat humanitare paralajmërojnë prej muajsh për përkeqësimin e gjendjes së civilëve në Libanin jugor.