Ligjvënësi amerikan i kërkon Starbucks-it të mbyllë dyqanet e para në Xinjiang të Kinës

Kryetari i Komitetit të Përzgjedhur të Dhomës së Përfaqësuesve për Kinën, John Moolenaar, i ka kërkuar gjigantit amerikan të kafesë Starbucks të mbyllë dy dyqanet e para që hapi këtë javë në Urumqi, kryeqytetin e rajonit të Xinjiang-ut — duke e quajtur vendimin "shokues dhe moralisht të falimentuar".

Starbucks hapi këtë javë dy dyqanet e para në Urumqi — një në bazarin e madh të qendrës së qytetit dhe një tjetër në aeroportin ndërkombëtar, siç njofton Reuters. Kompania tha në platformën kineze WeChat se dyqanet nuk janë thjesht kafeteri të reja, por një përvojë që përzien kulturën lokale me nevojat e klientëve, dhe drejtoresha ekzekutive për Kinën, Liu Wenjuan, shtoi se kompania do të vazhdojë të investojë në Xinjiang.

"Kjo është një vendim shokues dhe moralisht i falimentuar nga një kompani që mburret me përgjegjësinë sociale", tha Moolenaar në një deklaratë të publikuar të enjten, duke i kërkuar Starbucks-it "të ndryshojë menjëherë kurs dhe të mbyllë dyqanet", sipas Reuters. Sipas tij, nuk ka arsye të justifikueshme për një kompani amerikane që të bëjë biznes në një rajon ku Partia Komuniste Kineze ka ndaluar më shumë se një milion ujgurë dhe po u zhvesh besimin, gjuhën dhe kulturën.

Kina mohon akuzat e gjera për abuzime ndaj ujgurëve, popull kryesisht mysliman, duke thënë se politikat e saj synonin luftimin e terrorizmit, separatizmit dhe ekstremizmit fetar, raporton Reuters. As Starbucks dhe as Ministria e Jashtme e Kinës nuk iu përgjigjën menjëherë kërkesës për koment; Kina është në mes të pushimit kombëtar njëjavor.

Deklarata vjen në një moment kur marrëdhëniet SHBA–Kinë janë të tendosura: në prill 2026 Starbucks finalizoi sipërmarrjen e përbashkët në Kinë me investitorin strategjik Boyu Capital si aksionar me 60 për qind, dhe kjo sipërmarrje operon rreth 8,000 dyqane në Kinë, shton Reuters.