Lufta në Iran, rriten eksportet e naftës nga Gjiri, por Hormuzi mbetet i rrezikshëm

Pavarësisht luftës në Iran, eksportuesit e vendeve të Gjirit kanë gjetur mënyra të ndryshme për lëvizjen e karburanteve. Megjithatë, kalimi përmes ngushticës së Hormuzit mbetet i rrezikshëm, ndërsa disa klientë nuk po marrin dërgesat e tyre.

Eksportet e naftës së papërpunuar nga Lindja e Mesme u rritën në shtator në nivelin më të lartë mujor që nga nisja e luftës në Iran, shtatë muaj më parë.

Të dhënat paraprake nga instituti “Kpler” i vlerësojnë eksportet rajonale në 16.3 milionë fuçi naftë në ditë. Megjithatë, kjo shifër mbetet 3.2 milionë fuçi më e ulët se niveli prej 19.5 milionë fuçi në ditë i regjistruar në shkurt.

Arabia Saudite përbën pjesën dërrmuese të rritjes, duke dyfishuar eksportet nga 2.45 milionë fuçi në ditë në gusht, në rreth 5.4 milionë fuçi në ditë në shtator.

Flukset përmes ngushticës së Hormuzit vlerësohen të kenë arritur rreth 9.7 milionë fuçi në ditë. Arabia Saudite dërgoi gjithashtu naftë të papërpunuar shtesë nga terminalet e saj në Gjirin Persik, pas dëmeve të shkaktuara në naftësjellësin e saj në Detin e Kuq.

Totali rajonal përfshin edhe ngarkesa nafte të dërguara nga portet jashtë ngushticës së Hormuzit. Gjatë shtatorit, nëpër këtë rrugë kaluan gjithashtu anije-cisternë të Katarit, të ngarkuara me gaz natyral të lëngshëm.

Megjithatë, eksportet normale nuk janë rikthyer. Grupi “Qatar Energy” ka zgjatur pezullimin e dërgesave për disa klientë në Evropë dhe Azi.

Çrregullimi i eksporteve nisi pasi SHBA-ja dhe Izraeli nisën sulmet ndaj Iranit më 28 shkurt, konflikt që ka reduktuar ndjeshëm trafikun përmes Hormuzit, ndërsa të dyja palët kanë sulmuar anije tregtare pranë ngushticës.

Presidenti Donald Trump tha të shtunën se e kishte hedhur poshtë propozimin iranian për rihapjen e kalimit strategjik dhe ndalimin e akteve armiqësore brenda shtatë ditësh. Ai theksoi gjithashtu se aksi strategjik detar ishte tërësisht nën kontrollin e SHBA-së.

Në reagim, një zëdhënës i Parlamentit iranian deklaroi se asnjë infrastrukturë në rajon nuk do të jetë e sigurt pa u garantuar më parë siguria e Iranit.

“Në një rajon ku Irani nuk mund të shesë naftë, askush tjetër nuk do ta shesë”, tha zëdhënësi.