Makina përmbyset pas përplasjes në aksin Lushnjë–Berat, 6 të plagosur, mes tyre 3 fëmijë (VIDEO)

Një aksident rrugor është regjistruar këtë të mërkurë në aksin Lushnjë–Berat, në afërsi të Fiersheganit, ku një automjet tip “Golf” është përmbysur pasi është përfshirë në një përplasje me një mjet tjetër.

Sipas drejtuesit të mjetit, i cili po udhëtonte në drejtim të Beratit, një automjet që lëvizte në kahun e kundërt i ka bllokuar korsinë. Në përpjekje për të shmangur përplasjen, ai ka devijuar djathtas, duke u përplasur fillimisht me një automjet të parkuar dhe më pas duke u përmbysur.

Si pasojë e aksidentit kanë mbetur të lënduar të gjashtë personat që ndodheshin në automjet, mes tyre tre fëmijë. Të plagosurit janë transportuar në spital për të marrë ndihmën mjekësore.

Sipas informacioneve paraprake, të gjithë të lënduarit ndodhen në gjendje të stabilizuar dhe jashtë rrezikut për jetën.

Policia ka nisur hetimet për të zbardhur rrethanat e plota të aksidentit.