Mali i Zi dëbon pesë shtetas rusë të rrjetit hibrid ‘Rybar’, përfshirë themeluesin Mihail Zvinçuk

Policia e Malit të Zi (Uprava policije) njoftoi të premten se, në bashkëpunim me Agjencinë për Siguri Kombëtare (ANB) dhe partnerë ndërkombëtarë, ka dëbuar nga vendi pesë shtetas rusë, mes tyre çifti Mihail dhe Valerija Zvinçuk, drejtues të rrjetit hibrid rus “Rybar”. Sipas njoftimit, të pesëve u janë shfuqizuar lejet e qëndrimit për arsye të sigurisë kombëtare, ndërsa gjatë operacionit u sekuestruan pajisje të sofistikuara.

Siç raporton Pobjeda, në orët e para të mëngjesit të sotëm policia dhe ANB arrestuan në Risan çiftin Zvinçuk dhe tre persona të tjerë, të konsideruar bashkëpunëtorë të rrjetit. Sipas shkrimit të Vijesti-t, në kontrolle u gjetën pajisje dixhitale të sofistikuara, dronë, pajisje elektronike dhe telefona, ndërkohë që përpunimi penal i personave të përfshirë është në vijim.

Kryeministri malazez Milojko Spajiç deklaroi se mesazhi është i qartë: “Mali i Zi mbron interesat e veta dhe askush nuk do ta rrezikojë të ardhmen tonë evropiane.” Nga ana tjetër, zëdhënësja e Ministrisë së Jashtme ruse, Maria Zaharova, tha se ambasada ruse në Podgoricë po verifikon rrethanat e arrestimit; sipas saj, Zvinçuk është themeluesi i kanalit Telegram “Ribar”. Vetë projekti Rybar pretendon se shtetasit erdhën në Mal të Zi në mënyrë të ligjshme dhe se planifikonin xhirime në Manastirin e Cetinës me kërkesë zyrtare.

Konteksti i këtij veprimi lidhet me faktin se Departamenti amerikan i Shtetit ka ofruar deri në 10 milionë dollarë shpërblim për informacion mbi projektin Rybar dhe themeluesin e tij, Mihail Sergejeviç Zvinçuk.