Mali i Zi dhe Maqedonia e Veriut drejt linjës direkte ajrore: Ivanoviqi dhe Mucunski finalizojnë marrëveshjen

Zëvendëskryeministri i Malit të Zi për çështje evropiane dhe të jashtme, Filip Ivanoviq, u takua të enjten në Shkup me ministrin e Punëve të Jashtme dhe Tregtisë së Jashtme të Maqedonisë së Veriut, Timço Mucunski, ku në fokus ishin integrimi evropian dhe vendosja e një linje direkte ajrore mes dy vendeve, siç njofton Vijesti.

Të dy zyrtarët konfirmuan nivelin e lartë të marrëdhënieve miqësore, besimin e ndërsjellë dhe aleancën në NATO, si dhe vendosmërinë e përbashkët për një Ballkan Perëndimor të qëndrueshëm dhe të integruar evropianisht. Takimi u zhvillua në vitin kur të dy vendet shënojnë 20 vjet nga vendosja e marrëdhënieve diplomatike.

Në bisedime u theksua nevoja që procesi i anëtarësimit në Bashkimin Evropian të zhvillohet mbi bazën e meritave, përmes proceseve reformuese. Një pikë qendrore ishte finalizimi i nesërm i marrëveshjes për vendosjen e linjës së re ajrore mes Malit të Zi dhe Maqedonisë së Veriut, e cila do të lidhë drejtpërdrejt Podgoricën me Shkupin.

Bashkëbiseduesit diskutuan edhe për thellimin e mëtejshëm të bashkëpunimit në ekonomi, lidhjen infrastrukturore, energjetikë dhe turizëm.