Plenkoviq: Çështjet e hapura me Malin e Zi nuk janë bilaterale, por elemente vlerash në kapitujt 23 dhe 31

Kryeministri kroat Andrej Plenkoviq deklaroi sot, të enjten, në seancën e qeverisë kroate në Zagreb, duke iu referuar qëndrimit të tij të fundit në Mal të Zi, se çështjet e hapura me Malin e Zi nuk janë çështje bilaterale, por elemente vlerash që janë pjesë e kapitujve negociues në rrugën evropiane të Malit të Zi, siç njofton Vijesti.

“I kemi paraqitur pritshmëritë palës malazeze dhe besojmë se i kanë kuptuar mirë mesazhet tona”, tha Plenkoviqi, duke shtuar se Kroacia është e gatshme të punojë me Podgoricën që zgjidhja e çështjeve të hapura të krijojë parakushtet për përfundimin e negociatave të anëtarësimit të Malit të Zi. Ai tha se javën e kaluar pati një takim “shumë të detajuar” me kryeministrin malazez Milojko Spajiq.

Si sinjal pozitiv, sipas raportimeve nga Zagrebi, Plenkoviqi vlerësoi pllakën përkujtimore në kampin Morinj, që përkujton atë që ndodhi më 1991, dhe vendimin për ndryshimin e emrit të pishinës në Kotorr, që mbante emrin e një vaterpolisti që më pas ishte roje në kampin Morinj, ku u vranë dhe u torturuan të burgosur kroatë. Ai tha se për Kroacinë është “plotësisht e papranueshme” që pishina të mbajë emrin e dikujt që bëri gjëra të tilla në kohën e agresionit ndaj Kroacisë.

Plenkoviqi përsëriti se ka edhe disa kushte të rëndësishme lidhur me Kapitullin 23 (gjyqësori dhe të drejtat themelore) dhe Kapitullin 31 (politika e jashtme, e sigurisë dhe e mbrojtjes). Kroacia ka publikuar së fundi tetë kushte që Mali i Zi duhet të përmbushë para anëtarësimit në BE, shumica lidhur me pasojat e luftërave të viteve 1990: përveç dëmshpërblimit të ish-të burgosurve të Morinjit, Zagrebi kërkon vazhdimin e kërkimit për 14 persona që Kroacia ende i mban si të zhdukur nga luftërat e viteve 1990, ndjekjen penale të krimeve të luftës, zgjidhjen e kërkesave pronësore të familjeve kroate në Mal të Zi, marrëveshjen për kufirin dhe zgjidhjen e mosmarrëveshjes për pronësinë e anijes shkollore “Jadran”.

Qeveria malazeze më 19 tetor ndryshoi emrin e pishinës së qytetit në Kotorr nga Zoran “Džimi” Gopčeviq në “Pishina e qytetit – Petar II Petroviq Njegosh” dhe miratoi në mënyrë retroaktive pllakën përkujtimore për të burgosurit kroatë të vendosur në Morinj më 2022, duke përmbushur kështu dy nga tetë kërkesat kroate.