FC Malisheva ka regjistruar njërën prej fitoreve më të rëndësishme në historinë e klubit, duke mposhtur 2:0 skuadrën skoceze Hibernian në ndeshjen e parë të raundit të dytë kualifikues të UEFA Conference League.

Takimi, i zhvilluar të enjten mbrëma në stadiumin “Fadil Vokrri” në Prishtinë solli një tjetër paraqitje të shkëlqyer të përfaqësuesit kosovar në arenën evropiane.

Heroi i ndeshjes ishte Kreshnik Uka. Golashënuesi më i mirë i Superligës së Kosovës në edicionin e kaluar, me 19 gola, zhbllokoi rezultatin në minutën e 21-të, pasi u shërbye në mënyrë ideale nga Arlind Veliu dhe realizoi nga afërsia.

Uka ishte protagonist edhe në golin e dytë. Në minutën e 90-të ai asistoi për Valmir Nafiun, i cili vulosi fitoren 2:0 dhe i dha Malishevës një epërsi të rëndësishme para ndeshjes së kthimit, që zhvillohet pas një jave në Skoci.

Për Malishevën kjo është paraqitja e tretë radhazi në kualifikimet e garave evropiane, ndërsa skuadra po vazhdon të shkruajë histori. Në raundin e parë kualifikues, ekipi kosovar eliminoi Vllazninë e Shkodrës.

Në anën tjetër, Hiberniani është një emër me traditë në futbollin skocez, me katër tituj kampioni dhe tre trofe të Kupës së Skocisë, ndonëse titullin e fundit e ka fituar në edicionin 1951/52.

Skuadra që siguron kualifikimin nga kjo përballje do të luajë në raundin e tretë kualifikues të UEFA Conference League ndaj fituesit të çiftit Bravo (Slloveni) – Shkëndija e Tetovës.