Mavraj për “Frankfurter Allgemeine Zeitung”, “Euro 2016 i shtrembëruar
Mbrojtësi i kombëtares shqiptare Mërgim Mavraj nuk e ka fshehur zhgënjimin për eliminimin e skuadrës kuqezi nga Euro 2016. Sipas tij, kjo nuk do të ndodhte nëse skuadrat në grupet e tjera nuk do të kishin bërë marrëveshje.
Shpresuan deri në fund se mund të kualfikoheshin.
Ndoqën në ankth të gjitha ndeshjet e fundit në grupet e tjerë të Euro 2016, por në fund zhgënjimi ishte më madh kur kuptuan se mund të kishte marrëveshje mes skuadrave që gjithashtu bënin llogaritë e tyre për në fazën tjetër të turneut.
Kjo është ideja edhe e Mërgim Mavraj, që nuk e ka fshehur aspak zhgënjimin në një intervistë dhënë për gazetën gjermane “Frankfurter Allgemeine Zeitung”.
Mërgim Mavraj mbrojtës i kombëtares: “U desh të ma shpjegonin një herë pas ndeshjes me Rumaninë. Pastaj e kuptova se do të na duhej të dridheshim për tre ditë para televizorit. Ky nuk mund të jetë kuptimi i një turneu që të ketë ndryshime të tilla. Ne luajtëm kundër Francës dhe Zvicrës, ndërsa të tjerët përballë kundërshtarëve më të dobët. Të tjerët e dinin saktësisht se si duhej të luanin për të na kaluar, meqë ne kishim mbaruar. Ky është shtrembërim i aktivitetit. Turqit, nëse do të kishin luajtur bashkë me ne të dielën, ndoshta nuk do të kishin arritur asnjëherë në 2-0, por do të ishin munduar të mbanin fitoren 1-0. Por ata e dinin se duhej të shënonin gol. Është e njëjta gjë për Portugalinë, të cilës mund t’i shërbente një 0-0. Ashtu siç nuk është e drejtë që të luash në një turne dy ndeshje të dobëta dhe pastaj të bësh një ndeshje të mirë për të kaluar turin”.
Kombëtarja e drejtuar nga Xhani de Biazi shpresonte në kombinimin e rezultateve të skuadrave të tjera për të kaluar grupin, por në fund asnjë prej skenarëve të mundshëm nuk u realizua dhe kjo ka zhgënyer më shumë futbollistët dhe tifozët kuqezi.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.