Mbi 1.200 tentativa për kalim ilegal të kufirit u parandaluan në tetor në Maqedoninë e Veriut
Policia zbardhi edhe dy raste të trafikimit të migrantëve, me 17 persona të përfshirë; kallëzime penale ndaj katër personave
Mbi 1.200 tentativa për kalim ilegal të kufirit u parandaluan gjatë muajit tetor në Maqedoninë e Veriut, siç njofton Alsat, duke iu referuar të dhënave të Ministrisë së Punëve të Brendshme. Sipas këtyre të dhënave, në kufijtë me vendet fqinje u parandaluan gjithsej 1.254 tentativa, pjesa më e madhe e të cilave u regjistrua në kufirin me Greqinë.
Në të njëjtën periudhë, policia zbardhi edhe dy raste të trafikimit të migrantëve, në të cilat u përfshinë gjithsej 17 persona, 13 nga Afganistani dhe katër nga Egjipti. Për tri vepra penale u ngritën kallëzime penale ndaj katër personave, thanë nga Ministria e Punëve të Brendshme.
Sipas vendit të origjinës, numri më i madh i tentativave u evidentua te personat nga Afganistani, me 321 raste. Në mesin e pesë vendeve me numrin më të lartë përfshihen edhe personat pa shtetësi, si dhe ata nga Egjipti, Sudani dhe Algjeria.
Krahasuar me tetorin e vitit të kaluar, struktura e migrantëve ka ndryshuar ndjeshëm. Tentativat nga personat pa shtetësi u rritën nga zero në 284, ndërsa ato nga shtetasit e Algjerisë u rritën nga 35 në 124. Te shtetasit e Sudanit shifrat mbetën pothuajse të njëjta, 124 këtë vit krahasuar me 127 vitin e kaluar, ndërsa te shtetasit e Afganistanit u shënua një rënie e lehtë, nga 329 në 321. Rënia më e theksuar u regjistrua te shtetasit e Egjiptit, nga 306 vitin e kaluar në 133 tentime këtë vit.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.