Mbi 424 mijë vizitorë gjatë muajve janar-maj në muzetë, parqet arkeologjike dhe kalatë

Institucionet dhe qendrat e trashëgimisë kulturore në vendin tonë gjatë muajve janar-maj 2026 kanë pritur mbi 424 mijë vizitorë vendas dhe të huaj. Gjatë kësaj periudhe, 143,086 vizitorë janë shënuar vetëm në muzetë kombëtarë në vendin tonë;188,437 vizitorë në parqet arkeologjike dhe 91,559 vizitorë në kala dhe monumente të kulturës.

Shifrat për numrin e vizitorëve u bënë me dije një ditë më parë nga Blendi Gonxhja ministër i Turizmit, Kulturës dhe Sportit, që shprehet se ka një rritje të numrit të vizitorëve. “Gjatë muajve janar-maj 2026, institucionet dhe qendrat e trashëgimisë kulturore kanë mirëpritur plot 424,082 vizitorë vendas dhe të huaj, duke e kthyer kulturën në një nga historitë më të bukura të suksesit të vendit. Krahasuar me të njëjtën periudhë të vitit 2023, vizitueshmëria është rritur me +95.71 për qind, ndërsa të ardhurat e gjeneruara kanë shënuar një rritje spektakolare prej +147.44 për qind!

Ndërsa krahasuar me vitin e shkuar vizitueshmëria u rrit me +9.9 për qind dhe të ardhurat u rritën me +7.3 për qind!”, shprehet ministri Blendi Gonxhja në një reagim të tij në rrjete sociale për numrin e vizitorëve gjatë muajve janar- maj 2026 në institucionet dhe qendrat e trashëgimisë kulturore në vend. Ministri Blendi Gonxhja thotë më tej, se trashëgimia jonë nuk është thjesht histori, ajo është energji, krenari kombëtare dhe një magnet, që tërheq gjithnjë e më shumë vizitorë nga vendi dhe e gjithë bota.