Mbrëmje muzikore në Rubik, Capreolus Duo performon në Kishën e Shëlbuemit

“Albania International Guitar Festival” mbërriti këtë vit në edicionin e dhjetë, me koncerte që po zhvillohen në Tiranë, por dhe në qytete të tjera të vendit. Në vijim të programit muzikor, koncerti i Capreolus Duo i përbërë nga Julian Richter dhe Verena Merstallinger nga Austria në ambientet e Kishës së Shëlbuemit në Rubik ishte një mbrëmje e veçantë. Publiku vendas në këtë koncert vlerësoi performancën e artistëve austriakë me duartrokitje të shumta dhe ngrohtësi të jashtëzakonshme.

Sipas organizatorëve të festivalit “Albania International Guitar Festival”, koncerti në këtë destinacion të veçantë synon që të promovojë dhe të rrisë ndërgjegjësimin për vlerat e trashëgimisë sonë kulturore, duke kontribuar njëkohësisht në konservimin dhe gjallërimin e saj. “Gjithashtu, këto aktivitete synojnë të nxisin zhvillimin e turizmit muzikor, duke e kthyer këtë monument të rëndësishëm në një pikë takimi mes artit, kulturës dhe vizitorëve”, thuhet rreth koncertit. Ky koncert u realizua në partneritet me Ambasada e Austrisë në Shqipëri, me mbështetjen e Ministria e Turizmit, Kulturës dhe Sportit, si dhe donatorë të tjerë. Jo vetëm koncerte për publikun, por edicioni i 10-të i “Albania International Guitar Festival” këtë vit në vendin tonë gjithashtu përfshin dhe masterklasa, workshope, prezantime kitarash, seminare dhe projektime filmash dokumentarë kushtuar figurave të rëndësishme të kitarës.

Edicioni i këtij viti nisi në muajin maj, por gjatë viteve të tij, festivali ka sjellë në Shqipëri emra të njohur si José María Gallardo del Rey, Paco Seco, Anton Baranov, Luigi Attademo, Quartetto di Cremona, Barcelona Duo, Vienna Duo, Petrit Çeku, Vlatko Stefanovski, Gabriel Guillén, Refik C. Kaya, Ingrid Riollot, Eduardo Inestal, Gerhard Reichenbach, Daniel März, Florian Palier e shumë të tjerë.