Mbushën pyjet e Fushë-Arrëzit me hashash, arrestohen 2 persona! Kultivuan qindra bimë narkotike në 15 parcela

Policia e Shkodrës ka finalizuar sot operacionin antikanabis të koduar “Gurra” ku goditi një rast të kultivimit të bimëve narkotike në malësinë e Fushë-Arrëzit në 15 parcela.

Ky operacion u zhvillua pas një hetimi disa-javor, për goditjen e një rasti të kultivimit të bimëve narkotike.

Në pranga janë vënë dy persona të dyshuar si autorë të kultivimit të 355 bimëve të dyshuara narkotike Cannabis Sativa.

“Shërbimet e Komisariatit të Policisë Pukë, nën drejtimin e Prokurorisë dhe në bashkëpunim me Forcat Operacionale, në vijim të një hetimi disa-javor, të kryer me metoda proaktive, për goditjen e veprimtarisë kriminale në fushën e kultivimit të bimëve narkotike, finalizuan operacionin policor të koduar “Gurra”. Si rezultat i operacionit, u identifikuan dhe u arrestuan në flagrancë shtetasit: E. P., 20 vjeç; dhe S. J., 50 vjeç, të dy banues në fshatin Aprip e Gurit, Fushë Arrëz”, thuhet në njoftim.

Më tej sqarohet edhe aktiviteti i të dyshuarve.

Nga veprimet hetimore të kryera, dyshohet se këta shtetas, në 15 parcela, në tokë publike, në fshatin Aprip e Gurit, kanë kultivuar 355 bimë të dyshuara narkotike Cannabis Sativa”, thuhet në njoftimin e policisë”, bëri me dije policia.

Sakaq bimët e dyshuara narkotike u asgjësuan me anë të djegies.

Kurse materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.