Mehaj: Dronët Bayraktar, nuk janë pajisjet e vetme që ka Ushtria e Kosovës

Për armatimin e Ushtrisë së Kosovës me dronë luftarak Bayraktar TB2 ka shkruar edhe ministri i Mbrojtjes, Armend Mehaj. Ai thotë se prioriteti i tij si ministër ka qenë blerja e armatimit modern të teknologjisë së fundit, sipas standardeve të NATO-së.

“Dronat Bayraktar janë lloji më i fundit i armatimit të cilat i kemi blerë, posedimit i të cilave kam vlerësuar së është i domosdoshëm për mbrojtjen e vendit tonë. Ky proces nuk ka qenë i lehtë, por me mbështetjen e pakursyer të kryeministrit Kurti, të Qeverisë dhe gjithashtu mbështetje të fuqishme ndërkombëtare me të cilët do të vazhdojmë të rrugëtojmë krah për krah gjithmonë, kemi arritur të përmbyllim me sukses edhe këtë projekt madhor”, ka shkruar ai.

Megjithatë, Mehaj thotë se këto nuk janë pajisjet e vetme që ka FSK.

“Ne jemi furnizuar e vazhdojmë të furnizohemi çdo ditë për të ngritur kapacitetet tona. Projektet në vazhdim do të jenë hapa të mëdhenj drejt zhvillimit të forcës tonë”, ka shkruar Mehaj, sipas të cilit, “FSK me shpirtin luftarak të trashëguar nga UÇK dhe me pajisjet moderne që po sigurohen çdo ditë, bëhet ushtri e pathyeshme dhe garantuese e paqes”.

Republika e Kosovës, sipas Mehajt, duhet të jetë vendi i 33 që anëtarësohet në NATO. “Detyrat tona në këtë rrugë do t’i kryejmë me përkushtim dhe së bashku do ta realizojmë edhe këtë aspiratë”, ka shkruar Mehaj në Facebook.