Merc në Miločer: Ballkani Perëndimor i qëndrueshëm, me rëndësi të madhe për të ardhmen e BE-së

Samiti i Liderëve të Procesit të Berlinit, që mbledh liderët e Ballkanit Perëndimor, përfaqësues të shteteve anëtare të Bashkimit Evropian dhe të organizatave ndërkombëtare, po mbahet sot në Miločer, njofton Portal Analitika.

„Sot vazhdojmë me bisedimet me fokus në forcimin e bashkëpunimit rajonal dhe në avancimin e së ardhmes sonë të përbashkët evropiane”, porositi kryeministri i Malit të Zi, Milojko Spajiç, duke theksuar se përkushtimi i Gjermanisë ndaj Ballkanit Perëndimor e ka mbajtur gjallë premtimin themelor evropian se reformat dhe bashkëpunimi hapin rrugën drejt një të ardhmeje të përbashkët.

„Prania juaj e forcon këtë premtim. Paqja afatgjatë rritet kur shtetet rriten së bashku”, tha Spajiç, duke iu drejtuar kancelarit gjerman Fridrih Merc. Sipas raportimit të Portal Analitika, kryeministri malazez theksoi se Mali i Zi është i vendosur ta meritojë vendin në BE përmes reformave dhe se „përparimi ynë mund të jetë mundësi për të gjithë Ballkanin Perëndimor”.

Kancelari gjerman Fridrih Merc tha se Mali i Zi pothuajse e ka përfunduar traktatin e anëtarësimit dhe se së bashku po punohet që zgjerimi i BE-së, i bazuar në merita, të jetë sa më i shpejtë. „Integrimi gradual bazohet në merita. Bashkimi Evropian e ka bërë pjesën e vet, por reformat dhe vullneti politik duhet të vijnë nga ju”, porositi Merc, duke shtuar se „BE-ja duhet ta vazhdojë procesin e zgjerimit”.

Ballkani Perëndimor i qëndrueshëm, sipas Mercit, është me rëndësi të madhe për të ardhmen e të gjithë Bashkimit Evropian. „Mund të mbështeteni në përkrahjen tonë për Samitin dhe për shtetet tuaja”, përfundoi kancelari gjerman, siç njofton Portal Analitika.