Mesazhi i ish-deputetes së PS për kërcënim nga Bajrat, Policia e Shkodrës reagon për Euronews Albania

Pas mesazhit të ish-deputetes së Partisë Socialiste, Marjana Koçeku, për kërcënim nga Bajrat e Shkodrës, Euronews Albania iu drejtua institucioneve ligjzbatuese për të marrë informacion zyrtar mbi rastin.

Burime zyrtare nga Policia e Shkodrës, të pyetura nga Euronews Albania, kanë bërë të ditur se deri në këtë moment nuk rezulton të jetë depozituar asnjë denoncim nga Koçeku apo familjarë të saj lidhur me pretendimet për kërcënim.

Ndërkohë, Euronews Albania i është drejtuar edhe Prokurorisë së Posaçme Kundër Korrupsionit dhe Krimit të Organizuar për të mësuar nëse ish-deputetja e PS ka paraqitur kallëzim pranë këtij institucioni, apo nëse janë iniciuar ose pritet të nisin hetime kryesisht, për shkak të natyrës së subjektit të përfolur, që mund të përfshihet në kompetencën e Prokurorisë së Posaçme.