METEO – Reshje rekord në Japoni, 41 persona të plagosur nga përmbytjet

TOKIO, 9 shtator /ATSH-DPA/- Japonia po përballet me pasojat e reshjeve të jashtëzakonshme të shiut, të cilat kanë shkaktuar përmbytje të mëdha në qytetin Nagoya, në Japoninë qendrore. Të paktën 41 persona janë plagosur.

Uji ka hyrë në banesa, restorante dhe shkolla, ndërsa qindra njerëz nuk kanë mundur të kthehen në shtëpitë e tyre, duke e kaluar natën në strehimore emergjente.

Shumë makina janë dëmtuar dhe kanë mbetur të bllokuara në rrugët e qytetit.

Për shkak të situatës, edhe sportistë dhe pjesëmarrës të Lojërave Aziatike, që pritet të nisin më 19 shtator në prefekturën Aichi, ku ndodhet Nagoya, janë detyruar të strehohen përkohësisht.

Autoritetet japoneze kanë shpallur ndihmën emergjente për zonën dhe kanë paralajmëruar se reshjet e dendura mund të vazhdojnë.

Ekziston gjithashtu rreziku për rrëshqitje të dheut, në pjesë të mëdha të vendit.

Gjatë javëve të fundit, reshjet e dendura kanë shkaktuar disa incidente në Japoni.

Në prefekturën Fukushima, një grua humbi jetën pasi makina e saj u përmbyt në një nënkalim rrugor. /