METEO – Viktima, të plagosur dhe dëme të mëdha materiale në Ballkan pas motit të keq

SARAJEVË, 22 korrik /ATSH-AFP/ – Stuhi të forta që përfshinë Ballkanin gjatë mesnatës kanë shkaktuar të paktën një viktimë në Shqipëri, 13 të plagosur në rajon dhe dëme të konsiderueshme në bujqësi, infrastrukturë dhe ndërtesa.

Këto reshje dhe erëra të fuqishme erdhën pas disa valëve të të nxehtit dhe një periudhe të gjatë thatësire që ka prekur Evropën Qendrore dhe Ballkanin.

Në Shqipëri, një elektricist humbi jetën në Himarë teksa po përpiqej të riparonte një linjë elektrike të dëmtuar nga stuhia. Ndërkohë, në Sarandë, tre persona u shtruan në spital pasi u plagosën nga rënia e pemëve dhe copat e xhamit të thyer.

Në Bosnje dhe Hercegovinë, rajoni i Hercegovinës u godit më rëndë, veçanërisht zona e Nevesinjes.

Kryetari i bashkisë, Milenko Avdaloviç, deklaroi se dëmet në bujqësi arrijnë në miliona marka boshnjake.

Sipas tij, stuhia shkatërroi pothuajse tërësisht kulturat e patateve, qepëve, lakrave dhe pemishtet, ndërsa dëme u raportuan edhe në vreshtat e zonave Grude dhe Ljubushki.

Në Maqedoninë e Veriut, erërat arritën shpejtësi deri në 134 km/h në Shtip dhe 130 km/h në Shkup.

Numri i emergjencës 112 mori mbi 9 000 telefonata, ndërsa autoritetet raportuan 10 të plagosur.

Në kryeqytet u dëmtuan mbi 100 automjete, u rrëzuan 189 pemë dhe u dëmtuan disa ndërtesa publike, përfshirë Presidencën, disa ministri dhe aeroportin.

Edhe Kroacia u përball me mot të ashpër, sidomos përgjatë bregdetit të Adriatikut.

Në ishullin Hvar, niveli i detit u rrit me rreth 1,5 metra, duke përmbytur shëtitoren dhe disa rrugë në Stari Grad.

Rritje e nivelit të detit u regjistrua edhe në ishujt Vis dhe Korçula, por pa dëme të mëdha.

Shkencëtarët paralajmërojnë se, si pasojë e ndryshimeve klimatike dhe ngrohjes globale të shkaktuar nga emetimet e lëndëve djegëse fosile, fenomenet ekstreme të motit pritet të bëhen gjithnjë e më të shpeshta dhe më intensive në vitet e ardhshme./  /Ad.Ab./ a.jor.