MILLATOVIQ NË NJU JORK: MALI I ZI DUHET TË KUFIZOJË RRJETET SOCIALE PËR NËN 16-VJEÇARËT

_{Foto: predsjednik.me}

Presidenti i Malit të Zi, Jakov Millatoviq, ka deklaruar në Nju Jork se Mali i Zi duhet të shqyrtojë seriozisht kufizimin e qasjes në rrjetet sociale për fëmijët nën moshën 16 vjeç.

Millatoviq mori pjesë në dialogun e nivelit të lartë kushtuar të drejtave dhe mbrojtjes së fëmijëve në epokën e inteligjencës artificiale, ku u diskutua për sigurinë, privatësinë dhe mirëqenien e fëmijëve në një mjedis digjital që po zhvillohet me shpejtësi.

Millatoviq theksoi se fëmijët sot po rriten në një hapësirë digjitale që ndryshon shumë më shpejt sesa rregullat që synojnë t’i mbrojnë ata.

Sipas tij, Mali i Zi duhet të nisë një debat të gjerë me prindërit, ekspertët, shkollat dhe të rinjtë, duke shqyrtuar edhe përvojat e vendeve që tashmë po ndërmarrin hapa në këtë drejtim.

Ai tha se fëmijëve duhet t’u rikthehet e drejta për një fëmijëri të shëndetshme dhe të pavarur nga ekranet, të mbushur me lojë, shoqërim, natyrë dhe jetë reale.

Në këtë kuadër, ai përmendi Spanjën dhe Francën, të cilat kanë paralajmëruar kufizime për qasjen në rrjetet sociale për moshat nën 16 vjeç, ndërsa edhe Bashkimi Evropian po zhvillon rregulla të reja për forcimin e mbrojtjes së fëmijëve në internet.

Në takimin në Nju Jork u diskutua edhe për nismën globale për të drejtat dhe mbrojtjen e fëmijëve në epokën e inteligjencës artificiale, e cila synon që siguria, të drejtat dhe mirëqenia e fëmijëve të jenë pjesë përbërëse e zhvillimit dhe menaxhimit të teknologjive të reja.

Millatoviq theksoi se teknologjia duhet të krijojë mundësi për fëmijët dhe jo të rrezikojë sigurinë dhe zhvillimin e tyre.