Modrić: I uroj më të mirat Mourinhos, por nuk më ka telefonuar. E ndiej se fundi i karrierës po afron

Luka Modrić, në pritje për të zbuluar nëse do të qëndrojë te Milani, foli pas fitores së Kroacisë ndaj Ganës. Mesfushori kroat pranoi se fundi i karrierës së tij është gjithnjë e më pranë. “Fundi i karrierës sime po afrohet gjithnjë e më shumë. E di që kam një moshë të caktuar”, – deklaroi Modrić.

Ai komentoi edhe zërat që e lidhin me një rikthim te Real Madridi, pas kërkesës së supozuar të José Mourinhos për ta pasur në staf. “Mourinho nuk më ka telefonuar. I uroj më të mirat, është një trajner i veçantë. Kam shumë respekt dhe vlerësim për të”, – u shpreh veterani kroat.

Modrić u drejtua nga Mourinho te Real Madridi gjatë sezonit 2012-2013, që ishte sezoni i fundit i portugezit në stolin e “Los Blancos”, në aventurën e tij të parë aty, si edhe viti i parë i mesfushorit kroat në “Santiago Bernabéu”. Nën drejtimin e Mourinhos, kroati zhvilloi 53 ndeshje dhe shënoi 4 gola.