Mujoviq: Podgorica drejt transformimit të madh të lëvizshmërisë; Satler: 200 milionë euro investuar në hekurudhë

Kryetari i Podgoricës, Sasho Mujoviq, deklaroi se kryeqyteti malazez po përjeton një transformim të thellë të lëvizshmërisë urbane. Sipas tij, administrata e qytetit po përgatit një studim të ri trafiku, që synon parandalimin e bllokimeve dhe planifikimin e korridoreve për këmbësorët nëpër lagje.

Ambasadori i Bashkimit Evropian në Mal të Zi, Johan Satler, theksoi nga ana tjetër se BE-ja ka investuar rreth 200 milionë euro në rinovimin e rrjetit hekurudhor malazez, duke forcuar lidhjet e vendit me Serbinë. Këto investime, tha ai, janë pjesë e një përpjekjeje afatgjatë për modernizimin e transportit dhe integrimin rajonal.

Deklaratat u bënë në kuadër të Javës Evropiane të Lëvizshmërisë, e cila po zhvillohet në Podgoricë deri më 22 shtator. Tema e sivjetme është “drejtësia ndërgjeneruese” — një koncept që synon përfshirjen si të të rinjve, ashtu edhe të të moshuarve në politikat e mobilitetit.

Satler ftoi qytetarët t’i bashkohen xhiros me biçikletë të organizuar nga OJQ-ja Biciklo.me më 22 shtator. Ai gjithashtu njoftoi se javën e ardhshme në Zhabjak do të shënohet 35-vjetori i Deklaratës së Shtetit Ekologjik.

Ambasadori falënderoi kryetarin Mujoviq për bashkëpunimin e ngushtë, duke vërejtur se “rendi shihet në rrugët e qytetit” — një shenjë, sipas tij, e përparimit që po bën Podgorica.

Burimi: RTCG