Mungesa e hapësirës në banesa, çiftet e reja jetojnë me prindërit, fëmijët pa dhomën e tyre

Mungesa e hapësirës në banesa vijon të mbetet një nga problemet më të mëdha sociale në Shqipëri. Të dhënat më të fundit nga Eurostat, të përditësuara në fund të prillit 2026, tregojnë se vendi ynë renditet ndër më të prekurit në Europë nga mbipopullimi në banesa.

Sipas statistikave, 57.1% e shqiptarëve jetojnë në kushte mbipopullimi, një shifër shumë më e lartë krahasuar me mesataren e Bashkimit Europian prej 16.9%. Kjo nënkupton se shumë familje nuk disponojnë numrin minimal të dhomave sipas standardeve europiane.

Në praktikë, fenomeni reflektohet në jetën e përditshme: shumë çifte të reja vazhdojnë të jetojnë me prindërit, ndërsa fëmijët shpesh ndajnë dhomën me motrat apo vëllezërit edhe në moshë më të rritur. Shkaqet kryesore lidhen me çmimet e larta të banesave, pagat e ulëta dhe vështirësinë për të siguruar një shtëpi të pavarur.

Eurostat e konsideron një banesë të mbipopulluar kur familja nuk ka hapësirë të mjaftueshme sipas standardeve minimale për çifte, të rritur dhe fëmijë, bazuar në moshë dhe gjini.

Në krahasim me vendet e BE-së, Shqipëria afrohet më shumë me vendet e Ballkanit dhe Europës Lindore, ku familjet janë më të mëdha dhe kushtet e strehimit më sfiduese. Ndërkohë, në Europën Perëndimore dominojnë familjet e vogla dhe banesat me më shumë hapësirë për frymë.