Ndërtonte pa leje një objekt 5-katësh në Himarë, arrestohet 39-vjeçari, në kërkim 3 punonjës të IMT

Një 39-vjeçar është arrestuar në flagrancë në Himarë, pasi akuzohet se po ndërtonte pa leje një objekt 5-katësh, një prej kateve të të cilit ishte nëntokë.

Policia e Himarës bën me dije se gjatë kontrolleve dhe verifikimeve në terren, në kuadër të masave për parandalimin dhe evidentimin e shkeljeve gjatë sezonit turistik, është konstatuar objekti në ndërtim në vendin e quajtur “Sugë”.

Në vijim të veprimeve procedurale, në pranga ka rënë pronari i objektit, L. B., 39 vjeç, banues në Tiranë.

Ndërkohë, policia ka shpallur në kërkim tre punonjës të Inspektoratit të Mbrojtjes së Territorit të Bashkisë Himarë, të dyshuar për shpërdorim detyre.

Në kërkim janë shpallur D. H., 46 vjeç, me detyrë kryeinspektor, si dhe inspektorët M. K., 31 vjeç dhe A. H., 42 vjeç. Sipas policisë, të tre janë banues në Tiranë dhe Gjirokastër.

Uniformat blu vijojnë punën për kapjen e tyre, ndërsa po punohet edhe për individualizimin dhe dokumentimin e përgjegjësive penale.

Materialet procedurale i janë referuar Prokurorisë për veprime të mëtejshme, ndërsa kontrollet dhe verifikimet në terren do të vijojnë.