Ndërtuan ambient poshtë kotecit për kultivimin e drogës, kapet një person në Maliq, një në kërkim

Prokuroria e Koçës, pas hetimeve në goditjen e një rasti të kultivimit dhe përpunimit të lëndëve narkotike në fshatin Vreshtas të Maliq, arrestun shtetasin me iniciale K.L., ndërsa një person tjetër është shpallur në kërkim.

Sipas hetimeve, autorët kishin ndërtuar një ambient të fshehtë poshtë një koteci shpendësh, të maskuar posaçërisht për kultivimin dhe tharjen e bimëve narkotike kanabis sativa. Hyrja në ambient realizohej përmes një hapësire të improvizuar që të çonte në një dhomë të ndërtuar nën tokë.

Nga kontrollet rezultoi se ambienti ishte organizuar në mënyrë profesionale, me mure termoizoluese dhe i pajisur me sisteme ventilimi, ndriçimi, ngrohjeje dhe ujitjeje për kultivimin e bimëve narkotike. Në të u gjetën edhe zona të posaçme për tharjen e cannabis-it, ku bimët ishin të varura në struktura të improvizuara.

Gjatë operacionit u sekuestruan rreth 5.4 kilogramë lëndë e dyshuar narkotike kanabis sativa në forma të ndryshme, një sasi e vogël e dyshuar kokainë, si dhe pajisje të shumta për kultivimin dhe përpunimin e drogës, përfshirë llampa ndriçimi, sistem ventilimi, peshore elektronike dhe vazo.

Policia sekuestroi gjithashtu një armë në formën e pistoletës me bombol gazi të kompresuar.

Nga verifikimet rezultoi se ambienti furnizohej me energji elektrike në mënyrë të paligjshme, përmes lidhjes direkte me rrjetin e shpërndarjes.

Prokuroria bëri të ditur se hetimet vijojnë për identifikimin e personave të tjerë të përfshirë dhe dokumentimin e plotë të aktivitetit kriminal.