Ndryshon skema e financimit të sportit: kriteret e reja dhe afati i aplikimit për vitin 2027

Agjencia për Sport ka njoftuar ndryshim të skemës së financimit të sportit me ligjin e ri të sportit dhe rregulloren e re për financim, me kritere të reja të fokusuara më shumë në suksesin dhe rezultatet sportive.

Fidan Shatri nga Agjencia për Sport ka bërë të ditur se mbështetja direkte financiare për organizatat sportive në periudhën 2021–2026 ka arritur rreth 52 milionë euro, ndërsa përmes ligjit të sponsorizimit janë gjeneruar rreth 83 milionë euro për organizatat sportive dhe rreth 9 milionë euro për federatat sportive.

Sipas shifrave që dha: 2021 rreth 4,5 milionë euro; 2022 rreth 5,3 milionë; 2023 rreth 13,739 milionë; 2024 rreth 9,8 milionë; 2025 rreth 11,1 milionë; ndërsa në vitin 2026 deri tani rreth 7,5 milionë euro. Rritja e buxhetit, sipas tij, ka qenë kërkesë e vetë komunitetit sportiv.

Federatat kanë afat deri më 30 shtator për të aplikuar për financim për vitin 2027. Janë paralajmëruar edhe ndryshime në skemat e stimulimit dhe mbështetjes së përhershme për sportistët dhe trajnerët, ndërsa rregullorja do të qartësojë shpërblimet për medalje për të shmangur paqartësitë mes sporteve olimpike dhe jo-olimpike.

Sipas kritereve të reja, sportet kolektive do të trajtohen ndaras nga sportet individuale, ndërsa te sportet individuale 50 për qind e pikëve do të lidhen me sukseset e arritura nga federatat sportive.

Burimi: KosovaPress