ATHINĒ – Gjashtë të vdekur pas shpërthimit në një ndërtesë

ATHINË, 26 shtator /ATSH-ANA/ –Trupat e dy personave të fundit që rezultonin të zhdukur pas shembjes së një ndërtese në lagjen ”Plaka”, në qendër të Athinës, janë gjetur.

Ekipet e shpëtimit po punonin për nxjerrjen e dy trupave, me të cilët numri i viktimave të konfirmuara nga shembja e ndërtesës shkon në gjashtë.

Një shpërthim, që fillimisht iu atribua një rrjedhjeje gazi, tronditi ndërtesën dykatëshe në orën 07:30 të mëngjesit të së premtes, duke shkaktuar shembjen e saj dhe duke dëmtuar ndërtesat ngjitur e automjetet e parkuara, si dhe duke plagosur tre persona në afërsi, përveç banorëve të ndërtesës.

Më herët gjatë ditës, ekipet e shpëtimit që kërkonin në rrënojat e ndërtesës në rrugën “Lysikratous” gjetën katër trupa të tjerë, identiteti i të cilëve nuk ishte konfirmuar ende përfundimisht.

Dihej se në ndërtesën dykatëshe banonin një çift i moshuar në katin e sipërm dhe tre ose katër turistë amerikanë që kishin marrë me qira një ambient në katin e parë.

Në vendngjarje po operonin tridhjetë zjarrfikës me gjashtë automjete, përfshirë dy automjete të specializuara shpëtimi nga Njësia e Parë Speciale e Reagimit ndaj Katastrofave (EMAK), si dhe tre qen të specializuar për kërkim-shpëtim. Në vendngjarje ndodhej gjithashtu një ekip nga Drejtoria për Hetimin e Krimeve të Zjarrvënies, së bashku me policinë dhe ambulancat.

Bashkia e Athinës po ndihmonte Brigadën e Zjarrfikësve duke vënë në dispozicion makineri të rënda për largimin e rrënojave.