Nëse doni të kuptoni se sa e lirë është media në Shqipëri, mjafton të shihni rastin e Zvërnecit.

Këtë situatë skandaloze nuk do ta kishim mësuar nëse nuk do të kishim parë videot e protestuesve dhe 2-3 gazetarëve që patën shkuar me iniciativë private. Asnjë televizion, gazetë apo portal nuk kishte dërguar gazetar me përjashtim të Birn (organizatë jo-fitimprurëse).

Po ky rrjet, ditën e premte publikoi një investigim që tregonte me dokumenta mbivendosjen e titujve të pronësisë në këtë zonë dhe dhënien e lejes së zhvillimit kur palët janë ende në proces gjyqësor dhe pronësia e tokës nuk është e qartë. Shkrimi tregonte qartë lidhjet e pushtetit, grupeve kriminale, biznesmenëve vendas të fuqishëm dhe familjes së presidentit Trump për zbatimin e projektit të ndërtimit në këto toka.

Asnjë televizion (kritik ose jo me qeverinë), asnjë emision, me përjashtim të vetëm 2 portaleve periferike, nuk ripublikuan gjetjet e shkrimit.

Pra, jo vetëm që iniciativa për të nisur vetë investgime se çfarë po ndodh në Zvërnec nuk merret, por as kur këto gjetje janë gati, askush nuk i flet dhe diskuton. Në kontrast me këtë, të gjithë në bllok raportuan përgjigjen e kryeministrit Rama për ndërtimin që po ndodh në Zvërnec dhe reagimin e kompanisë ndërtuese për incidentet e ndodhura gjatë protestës.

Liria e medias në Shqipëri është kjo: mund të jesh kritik me Ramën, Berishën, mund të raportosh ngjarje dhe emra të personave të përfshirë në krimin e organizuar, madje mund të jesh kritik dhe me presidentin e SHBA Donald Trump apo familjen e tij, por jo me kompaninë ndërtuese në zonën e Pishë-Poros: KASTRATI!

Kastrati është një nga kompanitë më të mëdha në Shqipëri, e cila ka përfituar toka, licenca dhe të drejta koncesionare në shumë fusha dhe që është akuzuar disa herë nga politikanë të ndryshëm (përfshirë dhe ish-zv/kryeministrin Ahmetaj), si një shoqëri që menaxhohet nga vetë kryeministri Rama.

Për mua, nëse flasim për gazetari të lirë, ky është treguesi kryesor që media në Shqipëri është e kapur! Askush nuk guxon të thotë emrin e kompanisë Kastrati, qoftë kur vjen çështja te diskutimi i çmimit të naftës, qoftë kur vjen fjala te abuzimi me pronat publike dhe qoftë kur kemi të bëjmë me dhënien e koncesioneve apo ortakërinë e saj me familjarët e presidentit Trump për të ndërtuar në Zvërnec.