Një hap i ri në trajtimin e diabetit, kombinimi IcoSema synon të reduktojë injeksionet e shpeshta

ROMË,, 27 tetor /ATSH/ – Trajtimi i diabetit të tipit 2 mund të bëhet më i thjeshtë falë një kombinimi të ri të insulinës icodec dhe semaglutidit, i njohur si IcoSema, i cili synon të reduktojë nevojën për injeksione të shpeshta dhe të lehtësojë menaxhimin afatgjatë të sëmundjes, shkruan ilsole24.it.

Diabeti i tipit 2 është një sëmundje kronike që kërkon trajtim të vazhdueshëm, monitorim të nivelit të glukozës në gjak dhe përshtatje të terapisë me kalimin e kohës. Ndërsa sëmundja përparon, kontrolli i glicemisë mund të bëhet më i vështirë, duke bërë të nevojshme kombinimin e disa barnave ose kalimin në trajtime më komplekse.

Një nga vështirësitë kryesore për pacientët lidhet me nevojën për injeksione të përditshme, frikën nga episodet e hipoglicemisë, pra uljen e nivelit të sheqerit në gjak, si dhe shqetësimet për shtimin në peshë. Këta faktorë mund të ndikojnë në pranimin e trajtimit dhe në respektimin e rregullt të tij.

Kombinimi IcoSema synon të ofrojë një alternativë më praktike, duke bashkuar dy përbërës aktivë me mekanizma të ndryshëm veprimi në një injeksion të vetëm javor. Insulina icodec është një insulinë me veprim të zgjatur, e projektuar për administrim një herë në javë, ndërsa semaglutidi i përket grupit të barnave që veprojnë mbi receptorët GLP-1, duke ndihmuar në kontrollin e glukozës në gjak dhe në rregullimin e oreksit.

Falë këtij kombinimi, synohet të arrihet një kontroll më i mirë i glicemisë, duke ulur njëkohësisht barrën e injeksioneve të shpeshta për pacientët që kanë nevojë për trajtim me insulinë dhe semaglutid.

Një zhvillim i rëndësishëm në këtë drejtim është bërë edhe në nivelin rregullator evropian. Komiteti për Produktet Medicinale për Përdorim Njerëzor (CHMP) i Agjencisë Evropiane të Barnave (EMA) ka miratuar së fundmi një ndryshim në indikacionin terapeutik të IcoSema.

Sipas indikacionit të përditësuar, kombinimi është i përcaktuar për trajtimin e të rriturve me diabet mellitus të tipit 2, te të cilët sëmundja nuk kontrollohet në mënyrë të mjaftueshme, si shtesë e dietës, aktivitetit fizik dhe barnave antidiabetike orale.

Megjithatë, trajtimi nuk është i përshtatshëm për çdo pacient dhe përdorimi i tij duhet të përcaktohet nga mjeku, në bazë të nivelit të kontrollit të diabetit, trajtimeve të mëparshme dhe gjendjes së përgjithshme shëndetësore. Ashtu si me terapitë e tjera që përmbajnë insulinë, mbetet e rëndësishme edhe monitorimi i glicemisë për të ulur rrezikun e hipoglicemisë.

Në këtë mënyrë, kombinimi i insulinës icodec me semaglutidin përfaqëson një qasje të re në trajtimin e diabetit të tipit 2, me synimin për të thjeshtuar skemën terapeutike dhe për të ndihmuar pacientët të ruajnë kontrollin e sëmundjes në vazhdimësi.