“Nuk ka zgjidhje ushtarake” për luftën, i thotë Irani SHBA-së në Këshillin e Sigurimit të OKB-së

Nuk ka zgjidhje ushtarake për t’i dhënë fund luftës me Shtetet e Bashkuara, deklaroi Irani sot në Këshillin e Sigurimit të OKB-së, duke i bërë thirrje Uashingtonit të ndjekë rrugën e dialogut, siç njofton Al Jazeera.

Ambasadori iranian në Kombet e Bashkuara, Amir Saeid Iravani, tha se epoka e “humbjes së kohës dhe diktimit të kërkesave ka mbaruar”, duke theksuar se Irani ka ruajtur “gatishmërinë e plotë” për t’u mbrojtur nga sulmet e mëtejshme amerikane dhe izraelite dhe do të “përgjigjet vendosmërisht” nëse është e nevojshme.

“Ne nuk kemi sulmuar, por jemi përgjigjur vendosmërisht, dhe bota duhet ta kuptojë: kjo luftë nuk ishte zgjedhja e Iranit. Ajo na u imponua”, tha Iravani para Këshillit të Sigurimit. Ai gjithashtu akuzoi presidentin amerikan Donald Trump për dërgimin e “mesazheve kontradiktore” në menaxhimin e konfliktit.

Deklarata vjen ndërsa Teherani thotë se ka marrë përgjigjen e SHBA-së ndaj “planit 7-ditor” për t’i dhënë fund luftimeve dhe për të ri-hapur Ngushticën e Hormuzit, dhe se ajo po shqyrtohet brenda vendit — një sinjal se kanali diplomatik, edhe pse i brishtë, mbetet i hapur.