Nxita e procesit të paqes në Siri, liderët e 17 vendeve të botës takohen në Mynih

Një ndër propozimet më të rëndësishme të ardhura përpara nisjes së takimit të të ashtuquajturit “Grupi Ndërkombëtar i Mbështetjes për Sirinë”, është ai i Moskës për një armëpushim në Siri, që duhet të nisë më 1 Mars. Kjo çështje u diskutua nga diplomatët e rusë dhe ata amerikanë në Kombet e Bashkuara. Por Uashingtoni është kritik ndaj këtij propozimi. Një datë kaq e largët, i bën Shtetet e Bashkuara të dyshojnë se Rusia dhe qeveria e Bashar al-Asadit duan të shfrytëzojnë periudhën kohore deri në nisjen e armëpushimit për të shkatërruar grupet e moderuara rebele.

Për t’u diskutuar janë shtruar edhe hapat për të zbutur emergjencën humanitare në Siri, krijuar si pasojë e thellimit të konfliktit të armatosur të ashpër dhe të gjithëanshëm. Disa prej shteteve anëtare të këshillit të sigurimit të kombeve të bashkuara i kanë bërë thirrje Rusisë, të ndalë sulmet ajrore. Ditët e fundit, ushtria e Bashar al-Asadit, e ndihmuar nga bombardimet nga ajri të Moskës, ka ndërmarrë një ofensive të ashpër në Alepo për të marrë kontrollin e qytetit nga terroristët. Por kjo ofensivë ka detyruar 50 mijë banorë të largohen nga qyteti dhe t’i drejtohen Turqisë. Kombet e Bashkuara paralajmërojnë se rrethimi mund të ndërpresë furnizimin me ushqim dhe mjete të tjera jetike për 300 mijë banorë.

Bisedimet për paqen në Siri, që mbahen në Gjenevë duhej të rinisnin në fillim të këtij muaji. Por procesi u ndal pasi përfaqësuesit e grupimeve opozitare kërkuan që qeveria e Asadit të ndalte ofensivën e ashpër kundër tyre në Siri.