Operacioni “Precedenti”/ Arrestohet në Mat 40-vjeçari me armë zjarri pa leje në banesë

Policia e Matit ka finalizuar operacionin e koduar “Precedenti”, duke goditur një rast të armëmbajtjes pa leje.

Në kuadër të këtij operacioni, është arrestuar në flagrancë një 40-vjeçar me precedent të mëparshëm penal në fushën e armëmbajtjes pa leje.

Sipas Policisë, pas informacioneve operative dhe kontrolleve të kryera për parandalimin e ngjarjeve kriminale, specialistët e Komisariatit të Policisë Mat, në bashkëpunim me shërbimet e Postës së Policisë Klos, ushtruan kontroll në banesën e shtetasit me iniciale R. T., në fshatin Gurrë e Vogël.

Gjatë kontrollit, uniformat blu gjetën dhe sekuestruan një armë zjarri tip pushkë, së bashku me municion luftarak, të cilat 40-vjeçari i mbante pa leje.

Ai u arrestua për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.