Operacioni “Recidivisti” në Fier, arrestohet 41-vjeçari me kokainë të ndarë në doza, i dënuar dy herë për narkotikë
U kap në flagrancë duke qarkulluar me automjet në Fier; policia i sekuestroi kokainën, automjetin dhe celularin, ndërsa materialet iu referuan Prokurorisë së Fierit për veprën penale “Prodhimi dhe shitja e narkotikëve”.
Policia e Shtetit njofton se specialistët e Sektorit për Hetimin e Narkotikëve të Drejtorisë Vendore të Policisë Fier, në bashkëpunim me shërbimet e Forcës së Posaçme “Shqiponja”, finalizuan operacionin e koduar “Recidivisti” për goditjen e veprimtarive kriminale në fushën e narkotikëve.
Si rezultat i operacionit, siç njofton Policia e Shtetit, u arrestua në flagrancë shtetasi E. R., 41 vjeç, banues në Fier. Ai ka precedent të theksuar penal në fushën e narkotikëve dhe është dënuar dy herë për të njëjtën veprimtari kriminale.
41-vjeçari u ndalua nga shërbimet e policisë duke qarkulluar me automjet në qytetin e Fierit. Gjatë kontrollit në automjet dhe kontrollit fizik ndaj tij, policia gjeti një sasi lënde të dyshuar narkotike kokainë, një pjesë e së cilës ishte e ndarë në doza, gati për shitje, të cilën ai e posedonte me qëllim shitjen.
Policia sekuestroi sasinë e kokainës, një automjet dhe një celular. Materialet procedurale iu referuan Prokurorisë së Fierit, për veprime të mëtejshme, për veprën penale “Prodhimi dhe shitja e narkotikëve”.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.