Zëvendëskryeministri dhe ministri i Jashtëm, Behgjet Pacolli ka anuluar pjesëmarrjen në takimin e ministrave të Punëve të Jashtme të vendeve anëtare të procesit të bashkëpunimit në Europën Juglindore, për shkak të kërcënimeve nga Presidenti i Republikës serbe të Bosnjes, Miroslav Dodik.
Dodik sot në një intervistë për një medium ka deklaruar se “Pacolli dhe delegacioni i Kosovës nuk janë të mirëseardhur në Banja Llukë”.
“Sapo kam anuluar pjesëmarrjen time në takimin e ministrave të Punëve të Jashtme të vendeve anëtare të Procesit të bashkëpunimit në Evropën Juglindore për shkak të kërcënimeve nga Presidenti i Republikës serbe të Bosnje dhe Hercegovinës, Miroslav Dodik, i cili sot në një intervistë për një medium ka deklaruar se unë dhe delegacioni im nuk jemi të mirëseardhur në Banja Llukë. Me politikanë si Dodik, rajoni nuk mund të ecë përpara. Gjuha kërcënuese e Dodikut na kujton një të kaluar të afërt të politikanëve radikalë, si ky vet dhe pasojat e këtyre kërcënimeve. Republika e Kosovës mbetet e përkushtuar drejt bashkëpunimit rajonal, ndërsa ftoj zyrtarët e BE-së, sidomos ata në Komisionin Europian që të mos heshtin ndaj këtyre fenomeneve”, ka shkruar Pacolli.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.