Papa Leone XIV në Urbi et Orbi: Bota e plagosur nga luftrat

Në mesazhin e tij për Pashkën katolike, papa Leone XIV deklaroi sot se bota është e plagosur nga luftrat dhe abuzimi, por Zoti është i pranishëm përmes çarjeve të ringjalljes që hapen në errësirë.

”Ne e shohim atë të pranishme në padrejtësi, në egoizmin e individëve, në shtypjen e të varfërve, në mungesën e vëmendjes ndaj më të prekshmëve”, deklaroi papa.

”Ne e shohim atë në dhunë, në plagët e botës, në britmën e dhimbjes që ngrihet nga çdo anë për abuzimet që shtypin më të dobëtit, për idhujtarinë e fitimit që plaçkit burimet e tokës, për dhunën e luftës që vret dhe shkatërron”, theksoi ai.

”Por, Zoti është gjallë dhe mbetet me ne. Përmes çarjeve të ringjalljes që hapen në errësirë, ai ia beson zemrat tona shpresës”, tha papa në predikimin e tij të Pashkëve.

”Fuqia e vdekjes na kërcënon gjithmonë, brenda dhe jashtë. Brenda nesh, kur barra e mëkateve tona na pengon të fluturojmë; kur zhgënjimet ose vetmia që përjetojmë na i shterin shpresat; kur shqetësimet ose pakënaqësitë na e mbysin gëzimin e jetës; kur përjetojmë trishtim ose lodhje, kur ndihemi të tradhtuar ose të refuzuar, kur duhet të përballemi me dobësitë tona, me vuajtjet, me mundin e çdo dite, atëherë ndihemi sikur kemi përfunduar në një tunel nga i cili nuk shohim dalje”, tha ai.

“Është e vërtetë që shpesh duket sikur Zoti nuk ekziston: shohim padrejtësi, ligësi, indiferencë dhe mizori që nuk pakësohen kurrë. Por, është po aq e sigurt se në mes të errësirës diçka e re gjithmonë fillon të lulëzojë, e cila herët a vonë jep fryte”, theksoi papa.

”Pashka na jep këtë shpresë, duke na kujtuar se në Krishtin e ringjallur, një krijim i ri është i mundur çdo ditë. Pashka është një fillim i ri, është jeta që më në fund u bë e përjetshme nga fitorja e Zotit. Ne kemi nevojë për këtë këngë shprese”, përfundoi papa Leone XIV./ a.jor.