PARIS – Macron kërkon koordinim të G7 për përballimin e çmimeve të larta të karburanteve

PARIS, 2 tetor /ATSH – DPA/ – Franca po kërkon një koordinim më të madh ndërkombëtar për të përballuar rritjen e çmimeve të karburanteve në mbarë botën.

Presidenti francez, Emmanuel Macron, zhvilloi të premten një telefonatë me presidentin amerikan Donald Trump, gjatë së cilës theksoi nevojën për veprim të përbashkët ndaj rritjes së çmimeve të karburanteve, njoftoi Pallati Élysée.

Sipas presidencës franceze, Macron theksoi se vendet e G7 kanë interes të përbashkët për një qasje të koordinuar, pa vendosur kufizime ndaj eksporteve.

Trump ka deklaruar më herët se po shqyrton mundësinë e ndalimit të eksporteve të naftës diesel, masë që do të prekte edhe vendet evropiane, me synimin për të ulur çmimet në Shtetet e Bashkuara.

Bisedimet për këtë çështje po zhvillohen gjithashtu në nivel evropian dhe me Kanadanë. Franca, e cila mban presidencën e G7 këtë vit, po bashkëpunon edhe me Agjencinë Ndërkombëtare të Energjisë (IEA) për të trajtuar rritjen e çmimeve të karburanteve.

Sipas Élysée-së, liderët e vendeve të G7 pritet të zhvillojnë një videokonferencë sa më shpejt të jetë e mundur, me synim koordinimin e masave për të frenuar presionin mbi çmimet e karburanteve.